काठमाडौँ ९ कार्तिक २०८२ ।
भारतीय चलचित्र र टेलिभिजनका वरिष्ठ अभिनेता सतीश शाहको ७४ वर्षको उमेरमा निधन भएको छ।
उनको निधन शनिबार दिउँसो करिब २:३० बजे मुम्बईस्थित हिन्दुजा अस्पतालमा भएको भारतीय सञ्चारमाध्यमहरूले जनाएका छन्। शाह लामो समयदेखि मिर्गौला रोगबाट पीडित थिए।
उनका म्यानेजरका अनुसार शाहको पार्थिव शरीर अस्पतालमै राखिएको छ र अन्तिम संस्कार आइतबार गरिने छ। केही समयअघि उनले मिर्गौला प्रत्यारोपण गराएका थिए।
सतीश शाह भारतीय दर्शकमाझ विशेष गरी टेलिभिजन सिरिज ‘साराभाई भर्सेज साराभाई’ र कल्ट फिल्म ‘जाने भी दो यारो’ मार्फत अत्यन्त लोकप्रिय बनेका थिए।
उनले ‘मै हुँ ना’ (२००४), ‘कल हो ना हो’ (२००३), ‘फना’ (२००६) र ‘ओम शान्ति ओम’ (२००७) लगायत सयौँ सफल चलचित्रहरूमा अभिनय गरेका थिए।
सन् २००८ मा उनले अर्चना पूरन सिंहसँग कमेडी शो ‘कमेडी सर्कस’ मा निर्णायकको भूमिका पनि निर्वाह गरेका थिए।
उनको निधनपछि बलिउड र टेलिभिजन क्षेत्रका कलाकारहरूले गहिरो श्रद्धाञ्जली व्यक्त गरेका छन्।
चलचित्र निर्माता विवेक शर्माले शनिबार बिहान मात्रै शाहसँग कुराकानी भएको बताएका छन्।
शर्माका अनुसार शाहले आफूले “२०–२२ किलो तौल घटाएको” भन्दै सेल्फी पठाएका थिए र “अब म कति ह्यान्डसम देखिएको छु” भनेका थिए।
शाहले नोभेम्बरदेखि पुनः काममा फर्किने योजना बनाएका थिए।
सतीश शाहको जन्म गुजरातको माण्डवीमा भएको हो। उनले मुंबईको जेभियर कलेज र पुणेस्थित फिल्म एन्ड टेलिभिजन इन्स्टिच्युट अफ इन्डिया (FTII) बाट अध्ययन पूरा गरेका थिए।
सन् १९७२ मा उनले डिजाइनर मधु शाहसँग विवाह गरेका थिए।
उनले सन् १९७० मा फिल्म ‘भगवान परशुराम’ बाट आफ्नो चलचित्र यात्रा सुरु गरेका थिए।
सन् १९८४ मा टेलिभिजन शो ‘ये जो है जिन्दगी’ बाट उनले सानो पर्दामा प्रवेश गरे।
उक्त शोका ५५ एपिसोडमा ५५ फरक भूमिका निभाएर शाहले आफ्नो अद्वितीय अभिनय क्षमता प्रदर्शन गरेका थिए।
उनको बहुमुखी प्रतिभा र हास्यअभिनयले भारतीय टेलिभिजन र फिल्म क्षेत्रलाई नयाँ उचाइमा पुर्याएको मानिन्छ।
