पोखरा, २९ जेठ २०८२।
पोखरामा एक सुनचाँदी व्यवसायीलाई यौन दुर्व्यवहारको झुटो आरोपमा फसाएर ५० लाख फिरौती माग्ने तीन जनालाई प्रहरीले पक्राउ गरेको छ।
पोखरा महानगरपालिका वडा नम्बर ४ मा सुनचाँदी पसल संचालन गर्दै आएका व्यवसायीलाई यौन दुर्व्यवहारको झुटो आरोपमा फसाएर ५० लाख फिरौती माग्ने उनकै पसलमा काम गर्ने एक महिलासहित तीन जनालाई प्रहरीले पक्राउ गरेको हो ।
पक्राउ पर्नेमा पोखरा महानगरपालिका वडा नं. १५ की २७ वर्षीया मरियम राई, मोरङको बिराटनगरचोक बस्ने ३८ वर्षीय देव लिम्बु र संखुवासभा सभापोखरी गा.पा. २ बस्ने ४० वर्षीय टेकबहादुर सुवेदी रहेको जिल्ला प्रहरी कार्यालय कास्कीले जानकारी दिएको छ।
प्रहरीका अनुसार, अभियुक्ता मरियम राईले आफूले काम गर्ने सुनचांदी पसलका संचालकलाई यौन दुर्व्यवहार गरेको झुटो आरोप लगाएकीमा धम्क्याउनका लागि आफन्तको नातामा रहेका लिम्बु र सुवेदीलाई मोरङ र संखुवासभाबाट बोलाइ ल्याएकी थिइन्। तीनै जना मिलेर पोखरा–६ लेकसाइडस्थित होटलमा पसल संचालककी श्रीमतीलाई बोलाई एक सातासम्म मानसिक दबाब दिएको प्रहरीले जनाएको छ।
तीनजनाले महिलामार्फत संचालकको परिवारलाई “तपाईंको श्रीमानमाथि यौन दुर्व्यवहारको मुद्दा हालिदिन्छौं, जीवनभर पुग्ने सम्पत्ति, घर, व्यवसायको व्यवस्थापन गरिदिनु, होइन भने कानुनी रुपमा सडाइदिन्छौं” भन्दै डरधम्की दिएका थिए। यिनले त्यसवापत ५० लाख मागेको उजुरीपछि प्रहरीले सक्रियता देखाउँदै तिनै जनालाई नियन्त्रणमा लिएको हो।
प्रहरीले घटनामा प्रयोग भएका प्रमाणहरूसमेत बरामद गरेको छ। बरामद सामानहरूमा तीन थान मोबाइल, वार्तालापको अडियो रहेको एक थान पेनड्राइभ र एक्सर्टसनसँग सम्बन्धित कागजातहरू रहेका छन्।
घटनापछि तीनै जनालाई कास्की जिल्ला अदालतबाट ‘आपराधिक विश्वासघात तथा आपराधिक लाभ सम्बन्धी कसूरमा सात दिनको म्याद थप अनुमति लिई थप अनुसन्धान अघि बढाइएको प्रवक्ता प्रहरी नायब उपरीक्षक (प्रनाउ) हरिबहादुर बस्नेतले जानकारी दिए।
प्रहरी स्रोतका अनुसार, प्रारम्भिक अनुसन्धानमा पक्राउ परेकाहरुले योजनाबद्ध रूपमा पीडित परिवारलाई ब्ल्याकमेल गर्ने उद्देश्यले झुटो यौन आरोप तयार पारेको पुष्टि भएको छ। प्रहरीले घटनाको पृष्ठभूमि र संलग्नता थप गहिराइमा अध्ययन गरिरहेको प्रहरीले जनाएको छ।
