प्रहरीले देशभर नेत्रविक्रम चन्द विप्लवका कार्यकर्तालाई पक्राउ गरी मुद्दा चलाइरहेका बेला कैलालीमा भने विप्लव नेतृत्वको नेकपाले गुप्तचर विभागका कर्मचारीविरुद्ध नै पक्राउ पुर्जी जारी गरेको छ ।
विप्लवका नेतृत्वको प्रतिबन्धित नेपाल कम्युनिस्ट पार्टीले राष्ट्रिय अनुसन्धान विभागका असई भैरव कुँवरलाई ‘पक्राउ पुर्जी जारी गरेपछि सरकार र विप्लप बिचको तनाव बढ्ने आशङ्का गरिएको छ ।
साउन १७ गते अर्थात् शुक्रवार जारी गरिएको पक्राउ पुर्जीमा राष्ट्रिय अनुसनधान विभागका असई भैरव कुँवरलाई २५ दिनभित्र उपस्थित हुन भनिएको छ । कैलाली जनअदालत प्रमुख विकासको नामबाट उक्त पक्राउ पुर्जी जारी गरिएको छ । पक्राउ पुर्जी कुँवरको घर आसपास सार्वजनिक स्थानहरूमा टाँसिएको छ ।
कुँवरमाथि नेकपाका नेता कार्यकर्ताको सुराकी, अपहरण र ज्यान मार्ने उद्योग गरेको आरोप लगाइएको छ । पक्राउ पुजीमा जुनसुकै बेला पनि ’इन्काउन्टर’ गर्न आदेश जारी गरिएको छ । जिल्ला प्रहरी कार्यालय कैलालीले यस विषयमा आधिकारिक धारणा सार्वजनिक गरेको छ । यस विषयमा थप अनुसन्धान भइरहेको प्रहरीले जनाएको छ ।
यसैबीच, नेपाल कम्युनिस्ट पार्टीका कैलाली जिल्ला सदस्य बन्दु बमलाई शुक्रबार चौमलाबाट र शनिबार विहान जिल्ला सदस्य तथा जानकी गाउँपालिका इन्चार्ज राम विकलाई केपी–बादल गृह प्रशासनले गिरफ्तार गरी वेपत्ता बनाएको कैलाली जिल्ला सेक्रेटरी प्रकाश मल्लले बताएका छन् ।
सामाजिक फासिवादी केपी–पिके सरकारले पार्टीकामको सिलसिलामा खटिरहेको अवस्थामा विभिन्न ठाउँबाट जिल्ला सदस्य बन्दु बम र राम विकलाई गिरफ्तार गरी वेपत्ता बनाएकोप्रति कैलाली जिल्ला सेक्रेटरी प्रकाश मल्लले घोर भत्र्सना गरी तुरुन्त स–सम्मान रिहा नगरे कडाभन्दा कडा प्रतिरोध गर्ने चेतावनी दिएका छन् ।
