काठमाडौं– कञ्चनपुरकी १३ वर्षीया किशोरी निर्मला पन्तको बलात्कार र हत्यामा संलग्नलाई काबारहीको लागि दवाव दिन बिहिबार सिंहदरबार अगाडि धर्ना दिइएको छ ।
‘निर्मलाको निम्ति न्याय’ अभियानका अभियन्ताहरुले सिंहदबारको दक्षिण गेटअगाडि धर्ना दिएका हुन् ।
निषेधाज्ञा तोड्दै युवा युवतीहरुले प्रदर्शन गर्न थालेपछि सिंहदरबार दक्षिण गेट नै केहीबेर बन्द गरिएको थियो ।
ब्यानर र पप्लेटसहित उनीहरुले केहीबेर गेट अगाडि नै बसेर धर्नासमेत दिए ।
धर्नाका क्रममा उनीहरुले कञ्चनपुरका तत्कालिन एसपी डिल्लीराज विष्टले प्रमाण नष्ट गर्न भूमिका खेलेकाले कारबाही गर्न माग गरेका थिए भने गृहमन्त्री रामबहादुर थापा बादल र प्रहरी प्रमुख सर्वेन्द्र खनालको पनि राजीनामा माग गरेका थिए ।
उनीहरुको धर्नाका कारण सो क्षेत्रको यातायात आवागमन केहीबेर प्रभावित समेत बनेको थियो ।
पन्तको साउन १० गते बलात्कार पछि हत्या भएको थियो । बलात्कार र हत्यामा संलग्नलाई कारबाहीको लागि निरन्तर दवावमूलक कार्यक्रमहरु गरिँदै आएपनि हालसम्म दोषी पत्ता लाग्न सकेको छैन ।
