पोखरा, ९ फागुन २०८२ ।
प्रतिनिधिसभाको घोषित मिति फागुन २१ आउन १२ दिन बाँकी छ। तर हिमाल पारीको जिल्ला मनाङका केही निर्वाचन केन्द्रहरुको अझैसम्म अनुगमन हुन सकिरहेको छैन।
निर्वाचन नजिकिँदै गर्दा अधिक हिमपात जारी रहेकाले नार्पाभूमि गाउँपालिकामा रहेका मतदान केन्द्रहरुको अनुगमन गर्न समस्या भएको प्रमुख जिल्ला अधिकारी नवराज पौड्यालले बताए। उनले भने, ‘भौगोलिक अवस्था र चिसोका कारण अनुगमन प्रभावित भएको छ । समस्याका बीच मनाङ ङिस्याङ गाउँपालिकाका नौवटै मतदान केन्द्रको अनुगमन गरिएको छ । चामे र नासोँ गाउँपालिकाकामा रहेका मतदान केन्द्रको यसअघि नै अनुगमन भए पनि नार्पाभूमिका केन्द्रमा पुग्न सकिएको छैन ।’
मनाङ सदरमुकाम चामेबाट नार्पाभूमिका मतदान केन्द्र पुग्न हिँडेर दुई दिन लाग्छ । नार्पाभूमि गाउँपालिकाका वडा नं १ देखि ३ सम्म नार क्षेत्रमा तीन, वडा नं ४ र ५ को फू क्षेत्रमा दुई गरी पाँच वटा मतदान केन्द्र छन् ।
यहाँ आउजाउ गर्न समस्या भएपछि अस्थायी रूपमा मतदान केन्द्र सदरमुकाम सार्ने विषयमा पनि स्थानीय पालिकासँग छलफल भइरहेको प्रमुख जिल्ला अधिकारी पौड्यालले बताए ।
नार्पाभूमि गाउँपालिकामा ४ सय ८८ मतदाता छन् । जिल्ला निर्वाचन अधिकारी जीवन कुँवरले पाँच वटै वडामा मतदान केन्द्र कायम गरिएका र मौसम अनुकूल नभएमा के गर्ने भन्ने विषयामा छलफल भइरहेको बताए ।
जिल्लामा तीन हजार ६ सय २३ महिला र तीन हजार ३ सय ७७ पुरुष गरी सात हजार मतदाता छन् । विसं २०७९ को प्रतिनिधिसभा सदस्य निर्वाचनमा छ हजार ७ सय ७९ मतदाता रहेकामा यसपटक २ सय २१ मतदाता थपिएका हुन् ।
एकमात्र निर्वाचन क्षेत्र रहेको मनाङमा प्रतिनिधिसभा सदस्यका लागि नेपाली कांग्रेसका टेकबहादुर गुरुङ, नेपाल कम्युनिष्ट पार्टीका यशोदा सुवेदी गुरुङ र मङ्गोल नेसनल अर्गनाइजेसनका रामबहादुर गुरुङ प्रतिस्पर्धामा छन् ।
