बझाङमा संचालित लागू औषध गाँजा प्रशोधन केन्द्रमा प्रहरीले छापा मारेर ९१ जना किलू गाँजासहित तीन जनालाई पक्राउ गरेको छ। बझाङको खप्तड छान्ना गाउँपालिका ७ गोर्खाली गाउँमा संचालित लागू औषध गाँजा प्रशोधन केन्द्रमा प्रहरीले छापा मारेर ९१ जना किलो गाँजासहित तीन जनालाई पक्राउ गरेको हो ।
गोर्खाली गाउँका स्थानीय खडकबहादुर खड्काको घरमा लागूऔषधको कारोबार भइरहेको सूचना पाएको प्रहरीले उक्त घरमा छापा मार्दा ९१ किलो गाँजा, गाँजा बनाउन प्रयोग हुने कच्चा पदार्थ र गाँजा बनाउन प्रयोग हुने भाँडाकुँडासहित तीन जनालाई पक्राउ गरिएको प्रहरीले जानकारी दिएको छ। उक्त घरबाट तयारी गाँजा १४ किलो २१० ग्राम, गाँजाको दाना र पातसहितको कच्चा पदार्थ ७७ किलो ३०५ ग्राम बरामद गरिएको प्रहरीले जनाएको छ ।
प्रहरीले ६४ वर्षीय घरबेटी खड्कासहित गाँजा बनाउने काममा संलग्न गोरखा अजिरकोट गाउँपालिका २ खरिबोटका ३८ वर्षीय सन्तोष गुरुङ र पर्सा जिल्ला सुकौली पटौली गाउँपालिका ३ का ५५ वर्षीय राम गुरुङलाई पक्राउ गरेको छ ।
उनीहरुको साथबाट गाँजा बनाउने काममा प्रयोग हुने प्लाष्टिकका बाटा ५ वटा, डिजिटल तराजु, कैंचीं, ब्लेड, कार्टुनटेप, रबरका पोका, गाँजा छान्न प्रयोग गरिने कपडा र प्याकिङ गर्न प्रयोग हुने प्लाष्टिक समेत बरामद भएको प्रहरीले पत्रकार सम्मेलन मार्फत् जानकारी दिएको छ ।
पक्राउ परेका व्यक्तिले गाँजा बनाउने उद्योग नै चलाएर बाहिर पठाउनका लागि काम गरिरहेको बुझिएको जिल्ला प्रहरी कार्यालय बझाङका प्रमुख डिएसपी भरत शाहले बताए । उनले एक जना स्थानीयले गुरुङद्वयलाई ल्याएको भन्ने सूचना प्राप्त भएको र उक्त व्यक्तिको पनि खोजी भइरहेको बताए । यो कारोबारमा संलग्न अरुको बारेमा अनुसन्धान पछि मात्रै भन्न सकिने उनको भनाइ छ ।
