निलगिरी जलविद्युत् आयोजनास्थलमा सिमेन्ट पुर्याएर फर्कंदै गरेको एक ट्रक म्याग्दीमा दुर्घटनाग्रस्त हुँदा ट्रकधनीसहित दुई जनाको मृत्यु भएको छ।
म्याग्दीको न्नपूर्ण गाउँपालिका–४, नारच्याङमा निर्माणाधीन निलगिरी जलविद्युत् आयोजनास्थलमा सिमेन्ट पुर्याएर फर्कंदै गरेको ग २ ख ६५८ नम्बरको ट्रक मालचरी भन्ने ठाउँमा मंगलबार साँझ दुर्घटनाग्रस्त हुँदा ट्रकधनीसहित दुई जनाको मृत्यु भएको हो ।
दुर्घटनामा परी म्याग्दीको अन्नपूर्ण गाउँपालिका–१ दोवाका ४३ वर्षीय खुमबहादुर राम्जाली र मकवानपुर गोगनी–४ का ३४ वर्षीय सन्तबहादुर तितुङको मृत्यु भएको जिल्ला प्रहरी कार्यालय म्याग्दीका प्रहरी निरीक्षक राजन ढकालले जानकारी दिए । उनका अनुसार राम्जाली सवारी धनी र तितुङ चालक हुन् ।
घटनास्थलबाट उद्धार गरेर बेनी अस्पतालमा ल्याउँदा चिकित्सकले उनीहरूलाई मृत घोषणा गरेका थिए । शव परीक्षणका लागि बेनी अस्पतालमा राखिएको छ ।
प्रहरीका अनुसार, आयोजनाको छोटेपास्थित हेडवक्र्समा सिमेन्ट पुर्याएर फर्कने क्रममा मालचरी भन्ने ठाउँमा ट्रक घुम्तीमा मोड्ने क्रममा सडकबाट करिब ६० मिटर तल खसेर ट्रक दुर्घटनामा परेको हो ।
