सप्तरीस्थित नेपाल बैंक लिमिटेड फत्तेपुर शाखाका सुरक्षा गार्ड परशुराम फुयाँलको हत्या गरेको आरोपमा एक जना चितवनबाट पक्राउ परेका छन्। सुरक्षा गार्ड फुयाँलको हत्या आरोपमा प्रहरीले सप्तरीको सप्तकोशी नगरपालिका– ५ बस्ने ३२ वर्षका चन्द्रबहादुर सुवेदीलाई चितवनबाट पक्राउ गरेको हो।
अभियुक्त सुबेदीलाई दुई दिनपछि आइतबार प्रहरीले चितवनको राप्ति नगरापालिका–१ लोथरबाट पक्राउ गरेको सप्तरीका प्रवक्ता प्रहरी नायब उपरीक्षक ढुण्डीराज नेउपानेले जानकारी दिए । डीएसपी न्यौपानेका अनुसार सुवेदी सशस्त्र प्रहरीका भूतपूर्व जवान हुन् । उनले नौ वर्षसम्म सशस्त्र जागिर गरेपछि १६ महिनाअघि मात्रै राजीनामा दिएका थिए ।
‘डीएसपी न्यौपानेले उनी पेशेबर लुटेरा नभएको, आर्थिक अवस्था कमजोर भएको र ऋणको कारण लुटपाटमा संलग्न भएको प्रारम्भिक अनुसन्धानबाट देखिएको छ बताए ।
अभियुक्त सुबेदीले सप्तकोशी नगरपालिका वडा नम्बर २ का परशुराम फुयाँलको घाँटीमा खुकुरी प्रहार गरी हत्या गरिएको प्रहरीले जनाएको छ ।
डीएसपी न्यौपानेका अनुसार सुवेदी बिहीबार बिहान साढे ३ बजेतिर शौचालयको भेन्टिलेटरबाट बैंकमा प्रवेश गरेका थिए । उनले बैंकको एउटा ताला फुटाउन सके पनि अर्को ताला फुटाउन नसकेपछि गार्डको कोठामा पुगेका थिए । त्यहाँ चाबि लिन थाल्दा गार्डसँग झडप भएको थियो । त्यही क्रममा उनले गार्डको हत्या गरेका थिए ।
प्रहरीले घटनामा प्रयोग भएको खुकुरी बरामद गरेको छ । यस्तै, सुवेदीले घटनाको समयमा बोकेको झोला, घटनाको समयमा लगाएको जुत्ता, पञ्जा, सेन्डो, टोपी र सल, घटनामा प्रयोग भएको हेक्सो बलेड, रेन्चु, पिलास, डोरी र रड, वरदात स्थलमा प्रयोग गरेको काठ पनि बरामद गरेको छ ।
गार्डको हत्यापछि बैंक लुटपाटको प्रयास भएको थियो । तर लुट्न नसकेपछि फर्किएको सीसीटीभी फुटेजमा देखिएको थियो ।
