सल्यानमा मंगलबार बिहानै आफ्नै आमाको हत्या गर्ने छोरा पक्राउ परेका छन् । पक्राउ पर्नेमा शारदा नगरपालिका-१३ माथिल्नो सल्यानचौर निवासी २३ वर्षीय नवीन भण्डारी रहेका छन् ।
उनले आज बिहान ४ बजेतिर ४८ वर्षीया आमा शारदा भण्डारीलाई पैंयाको लट्ठी प्रहार गरी हत्या गरेका हुन् ।
जिल्ला प्रहरी कार्यालय सल्यानका अनुसार नवीनले बिहान ४ बजेतिर आमाबुबा सुतिरहेको कोठामा गइ पैंयाको लट्ठी प्रहार गरी आमाको हत्या गरेका हुन् । पैंयाको लट्ठी प्रहार गर्दा भण्डारीको टाउकोमा गहिरो चोट लागेको र घटनास्थलमै मृत्यु भएको प्रहरीले जनाएको छ ।
स्थानीय ओपेन्द्र भण्डारीले टेलिफोनमार्फत जानकारी गराएपछि प्रहरी हबल्दार कुलराज चौधरीको कमाण्डमा खटिएको तीन जनाको टोली घटनास्थलमा खटिइ नवीनलाई नियन्त्रणमा लिएको हो । प्रहरीले पक्राउ गरेका भण्डारीलाई जिल्ला प्रहरी कार्यालय सल्यान ल्याएको छ । हत्याको कारण खुल्न नसकेको जिल्ला प्रहरी कार्यालय सल्यानका सूचना अधिकारी प्रहरी निरीक्षक गोपाल श्रेष्ठले बताए ।
