सुँगुरको मुटु प्रत्यारोपण गरेको दुई महिनापछि अमेरिकी नागरिक डेभिड बेनेटको मृत्यु भएको छ।
अमेरिकाको युनिभर्सिटी अफ मेरिल्याण्ड मेडिकल सेन्टरमा मङ्गलबार दिउँसो उनको मृत्यु भएको हो ।
मेरिल्यान्ड निवासी ५७ वर्षीय डेभिड बेनेटको दुई महिनाअघि सुँगुरको मुटु प्रत्यारोपण गरिएको थियो ।
यो प्रत्यारोपणलाई बेनेटको जीवन बचाउने अन्तिम आशाको रूपमा लिइएको थियो तर उनको मृत्यु भएको छ । युनिभर्सिटी अफ मेरिल्याण्ड मेडिकल सेन्टरका चिकित्सकहरूलाई अमेरिकाको चिकित्सासम्बन्धी नियामक निकायले यो प्रक्रिया गर्न एउटा विशेष खालको छुट दिएको थियो ।
प्रत्यारोपण गर्ने चिकित्सा टोलीलाई यसले वर्षौँको अनुसन्धानको परिणाम दिएको र यसले विश्वभरि मानिसको जीवनलाई परिवर्तन गर्नसक्ने बताइएको थियो । शल्यक्रियाअघि उनी ६ साता ओछयानमै उपकरणजडित भएर बसेका थिए। मुटुमा समस्या देखिएपछि उनलाई जीवित राख्न त्यसो गरिएको थियो । तर सुँगुरको मुटु प्रत्यारोपण गरेको दुई महिनापछि बेनेटको मृत्यु भएपछि विभिन्न अड्कलबाजी हुनसक्ने सञ्चारमाध्यामहरुले जनाएका छन् ।
