पोखरा, १० बैशाख २०८१/
ताप्लेजुङदेखि झापा जाँदै गरेको एउटा जिप आइतबार दुर्घटनाग्रस्त हुँदा १४ जना घाइते भएका छन्। मेची राजमार्गको फिदिम-ताप्लेजुङ सडक खण्डअन्तर्गत पर्ने पाँचथरको हिलिहाङ गाउँपालिका-७ सल्लेरीमा मे १ ज १९४७ नम्वरको जीप दुर्घटनाग्रस्त भएको हो। उक्त दुर्घटनामा परी घाइते भएकामध्ये सात जनाको अवस्था गम्भीर रहेको छ ।
जीप दुर्घटनामा परेका घाइतेहरुमा उदयपुरको त्रियुगा घर भएका चालक प्रविण दनुवार, ताप्लेजुङ मिक्वाखोला-२ का चन्द्रप्रसाद थापा, झापा मेचीनगर ६ की वन्धना भण्डारी, उनका छोरा प्रसान सुवेदी र छोरी प्रसना सुवेदी रहेका छन् ।
त्यसैगरी ताप्लेजुङ फुङलिङ ३ की कमला रसाइली, उनकी छोरी तुलसा रसाइली र ताप्लेजुङ मिक्वाखोला गाँउपालिका-२ का झरेन्द्र थापालाई थप उपचारका लागि झापा रेफर गरिएको जिल्ला प्रहरी कार्यालय पाँचथरले जनाएको छ ।
जीप अनियन्त्रित भएर सडकदेखि करिब ५० मिटर तल झरेर दुर्घटना भएको जिल्ला प्रहरी कार्यालयका सूचना अधिकारी सुमित कुशवाहाले जानकारी दिए।
