पाँचथर र तेह्रथुमको विभिन्न स्थानबाट मोटरसाइकल चोरीमा संलग्न आठजनालाई पाँचथर प्रहरीले पक्राउ गरेको छ ।
चोरीका मोटरसाइकल खरिद गरी पाटपुर्जा पविर्तन गरेर सञ्चालन गर्नेलाई समेत पक्राउ गरिएको जिल्ला प्रहरी कार्यालय पाँचथरका प्रहरी नायब उपरीक्षक हरि खतिवडाले जानकारी दिए ।
तेह्रथुमको आठराई गाँउपालिका ४ का २३ वर्षीय श्रीप्रसाद तामाङ,१९ वर्षीय शिवकुमार तामाङ,२० वर्षीय सुरज पुर्वछाने मगर,२१ वर्षीय वासुदेव तामाङ, २१ वर्षीय पविन इङ्नामलाई प्रहरीले पक्राउ गरेको हो ।
ताप्लेजुङको आठराई त्रिबेणी गाउँपालिका १ घर भई आठराई ४ मा बस्दै आएका एनमान दियाली,इलामको फाकफोकथुम घर भइ आठराईमा दुग्ध डेरी सञ्चालन गर्ने २७ वर्षीय तारा बराल र पाँचथरको फालेलुङ गाउँपालिका ५ घर भइ फिदिम नगरपालिका १ मा ग्यारेज सञ्चालन गर्ने विरेन्द्र रानालाई प्रहरीले पक्राउ गरेको हो ।
उनीहरूलाई जिल्ला अदालत पाँचथरबाट म्याद थप गरी प्रहरीले अनुसन्धान गरिरहेको छ । पछिल्लो समयमा पाँचथरमा मोटरसाइकल चोरीका घटना बढिरहेका थिए ।
