काठमाडाैंबाट काभ्रेको मादनकुडारी जाँदै गरेको बस काभ्रेको विर्ता देउराली गाविसमा दुर्घटना हुँदा ३२ यात्रूको मृत्यु भएको छ छ । दुर्घटनामा चालीस जना घाइते भएका छन् । २६ जना घाइतेलाई उपचारका लागि हेलिकोप्टरबाट काठमाडौं ल्याइएको छ । तीन जनाको सदरमुकाम धुलिखेलमा उपचार भइरहेको छ ।
काठमाडौंबाट कोशीपारी मादनकुँडारी जाँदै गरेको बा ३ ख १०६ नम्बरको बस उकालोबाटोमा ब्याक भएर सडकबाट तल भीरमा खसेको छ । जिल्ला प्रहरी कार्यालय काभ्रेले मृतकको संख्या ३२ पुगेको जानकारी दिएको छ । घाइतेहरुमध्ये अधिकांशको अवस्था गम्भीर छ ।
घटना दिउँसो एक बजेतिर भए पनि झण्डै एकघण्टापछि मात्रै प्रहरी टोली घटनास्थल पुगेको थियो । अरुण यातायातको बसमा यात्रुहरु खचाखच भरिएको थियो र छतमा समेत बसेका थिए । साथै बसले चामलसहितका खाद्य वस्तु पनि बोकेको थियो ।
अतयाधिक लोड भएको बसको खहरे खोलाको उकोलोमा एक्कासी इन्जिन बन्द हुन पुग्यो । घाइतेहरुले बताए अनुसार चालकले स्टार्ट गर्ने योजनाका साथ ब्याक गरेका थिए । तर, ब्रेक लागेन र बस सडकबाट झण्डै ३ सय मिटर तल खस्यो ।
भिरमा बस खसेका कारण टुक्रा टुक्रा भएको थियो । पाखै भरी मृतकको शव र घाइते यात्रुहरु थिए । दुर्घटनाको खबर पाएसलगतै पुगेका स्थानीयबासी उद्धारमा जुटेका थिए भने केही समयपछि प्रहरी टोेली पनि पुगेको थियो ।
मृतकको शव संकलन जारी
घाइतेहरुलाई उद्धार गरी अस्पताल पठाएपछि अहिले भीरमा छरिएका मृतकका शव संकलन गर्ने कार्य भइरहेको छ ।निक्कै ठूलो भीरमा शवहरु यत्रतत्र छरिएकाले संकलनमा कठिनाई भइरहेको उद्धारमा संग्लग्न स्थानीय पुष्करराज पन्थले जानकारी दिएका छन् ।
घाइतेलाई काठमाडौं ल्याइयो
घाइतेलाई काठमाडौंबाट गएको नेपाली सेनाको हेलिकप्टरले उपचारका लागि काठमाडौं ल्याएको छ ।काभ्रेका प्रमुख जिल्ला अधिकारी बालकृष्ण पन्थीले दुर्घटनाका गम्भीर घाइतेलाई हेलिकप्टरबाट काठमाडौं पठाइएको जानकारी दिए । त्यस्तै तुलनात्मक रुपमा कम घाइतेहरुलाई अस्पतालसम्म पुर्याउन ५ वटा एम्बुलेन्सको प्रयोग गरिएको छ । उनीहरुलाई नजिकैको अस्पतालमा लगिएको छ ।
घाईते कोपिलाले अरुको उपचार गरिन
काठमान्डूको बबरमहलस्थित जनशक्ति विकास अनुसन्धान संस्थामा अनमी पढिरहेकी कात्तिके देउराली ज्यामिरे ६ की २१ वर्षकी कोपिला गौतम सोहि बसमा यात्रारत थिइन । बसको ढोका छेउमा बोरामाथि बसेर आफ्नो घरतिर जाँदै गरेकी गौतम दुर्घटनामा परिन् । आफू स्वयंम घाइते भएको अवस्थामा उनले अरुको उपचार गर्न भने छाडिनन् । उनले भनिन्, दुर्घटनापछि हेर्दा कोहीको हात भाँचिएको त कोहीले रगत आइरहेको थियो । सबैभन्दा ठीक छ म नै छु भन्ने लाग्यो ।’
उनका अनुसार घरमा काम लाग्छ भनेर पेनकिलर, ब्याण्डेज, मलहम बोकेकी थिइन् । बस दुर्घटनामा परेपछि उनले त्यही प्रयोग गरेर घाइतेहरुको उपचार गरिन् । ‘५/६ जनालाई पेनकिरल दिएँ । केहीलाई ब्याण्डेज लगाए’ उनले भनिन् ।
