बैतडीको पञ्चेश्वर गाउँपालिकाका स्वास्थ्य संयोजक राम सागर शाहकी (पुतारी) श्रीमती श्यामा शाहलाई प्रहरीले पक्राउ गरेको छ । अबैध रुपमा संचालन भएको भन्दै स्थानीय प्रशासनले बन्द गरेको श्यामा क्लिनिक खोलेको भेटिए पछि गाउँपालिकाका स्वास्थ्य संयोजक राम सागर शाहकी (पुतारी) श्रीमती श्यामा शाहलाई प्रहरीले पक्राउ गरेको हो ।
जिल्ला प्रशासन बैतडीले गत जेठ दोस्रो साता अवैध ठहर गर्दै सिल गरिएको श्यामा क्लिनिक पुनः बिना जानकारी सञ्चालन गरेको पाइएपछि उनलाई शुक्रवार पक्राउ गरिएको प्रहरीले जानकारी दिएको छ। सामान्य स्वास्थ्य शिक्षा समेत हाँसिल नगरेकी (नन मेडिकल पर्सन) श्यामा शाहले बिरामी जाँच्नेदेखि औषधी बिक्री वितरण गर्ने गरेको पाइएपछि मेडिकल सिल गरिएको थियो ।
श्यामालाई नियन्त्रणमा लिएको र अनुसन्धान भइरहेको जिल्ला प्रहरी कार्यालय बैतडीका सूचना अधिकारी योगेश खत्रीले जानकारी दिए । यस्तै स्थानीयहरूले प्रशासनलाई नटेर्ने र स्वास्थ्य जस्तो संवेदनशील क्षेत्रमाथि गम्भीर खेलबाड गर्ने स्वास्थ्य शाखा प्रमुख दम्पतीलाई हदैसम्मको कारबाही हुनुपर्ने माग गरेका छन् ।
