पोखरा स्वास्थ्य विज्ञान प्रतिष्ठान साबिक पश्चिमाञ्चल क्षेत्रीय अस्पतालमा सोमबार राती सुत्केरी गराउने क्रममा महिला र नवजात शिशु दुवैको मृत्यु भएको छ । गत जेठ २८ गते भर्ना भएकी २६ वर्षीया शर्मिला कुँवर दरई र उनको नवजात शिशुकोे उपचारको क्रममा मृत्यु भएको हो ।
दमौलीको ब्यास–१२ कमलबारी घरभएकी शर्मिलालाई दमौली अस्पतालले गत जेठ २१ गते नै सुत्केरी हुने समय दिएको थियो । त्यतिबेला अस्पताल पुग्दा चिकित्सक नभएका कारण पोखरा नै लैजानुपर्ने भन्दै एक हप्तापछि लैजान सुझाएको परिवारले बताएको छ ।
एक हप्तापछि पोखरा ल्याइएकी शर्मिला त्यतिबेलासम्म सकुशल नै रहेको श्रीमान् कृष्ण दरईले बताए । श्रीमान् कृष्ण गत जेठ १८ मा मात्र कुवेतबाट नेपाल आएका थिए ।
दोस्रो बच्चा जन्माउन लागेकी शर्मिलालाई सोमबार विहान ११ बजे व्यथा लाग्ने औषधी अस्पतालले दिएको थियो । अर्को औषधी दिउँसो ४ बजेतिर चढाएपछि भने उनलाई समस्या देखिएको शर्मिलाकी जेठानी निरु दरईले बताइन् । राती करिब ११ बजेको समयमा शर्मिलाको मृत्यु भएपछि मृत बच्चा निकालिएको थियो ।
परिवारले भने अस्पतालको लापरवाहीले सुत्केरीको मृत्युको आरोप लगाएका छन् । श्रीमान् कृष्ण दरईले अस्पतालले हेलचक्रयाई गरेका कारण आफ्नो श्रीमति र बच्चा गुमाउनुपरेको बताए । यता अस्पताल प्रमुख डा. भरत खत्रीले भने उपचारको क्रममा नै बिरामीकोे मृत्यु भएको बताएका छन् । यसमा अस्पतालको लापरवाही नरहेको र बिरामीको अवस्था नै गम्भीर हुन पुगेका कारण मृत्यु भएको बताए ।
अस्पतालमै कार्यरत स्त्री रोग विशेषज्ञ डा.राजेन्द्र अधिकारीले शर्मिलालाई एम्युनिटिक फ्ल्युड इम्बोलिजम अर्थात् बच्चा बस्ने पानी पाठेघरको नशाबाट फोक्सोमा पुगेका कारण मृत्युको बताए । उनका अनुसार सुत्केरी महिलामा तीस चालीस हजार देखि एक लाख जना मध्ये एकजनामात्र यो हुने गर्छ । डा. अधिकारीले अस्पतालमा लापरवाही नभएको र सुत्केरी गराउने क्रममा यस्तो जोखिम हुने बताए ।
कास्कीमा यस आर्थिक वर्ष २०७९-८० मा ६ जना सुत्केरी महिलाको सुत्केरी गराउने क्रममा मृत्यु भएको जिल्ला स्वास्थ्य कार्यालयले जनाएको छ ।
