प्रधानमन्त्री पुष्पकमल दाहाल प्रचण्डले मन्त्रिपरिषद बिस्तारको तयारी गरेका छन्।
उनले सत्ता गठबन्धन दलसँग सरकारमा सहभागी हुने मन्त्रीहरूको नाम मागिसकेका छन्।
नेपाली कांग्रेसले ८ मन्त्रालय पाउने भएको छ। नेकपा माओवादी केन्द्रले ५, जसपाले २ र एकीकृत समाजवादीले २ मन्त्रालय पाउने सहमति सत्ता गठबन्धनभित्र बनेको छ।
जसपाले अहिले १ मन्त्रालय लिएकोमा अब एक राज्यमन्त्री पाउने भएको छ। लोसपाले १, नागरिक उन्मुक्ति पार्टीले १, नेपाल समाजवादी पार्टीले १ र आम जनता पार्टीले १ मन्त्रालय पाउने भएका छन्।
नेकपा एकीकृत समाजवादीले मन्त्रीहरूको नामसमेत टुंग्याइसकेको छ। एकीकृत समाजवादीबाट उपाध्यक्ष बेदुराम भूसाल र उपमहासचिव प्रकाश ज्वाला मन्त्री बन्ने भएका छन्।
सत्ता गठबन्धनको बुधबार साँझ बालुवाटारमा बसेको बैठकले मन्त्रालय भागबन्डा करिब टुंग्याएको थियो। आज दलहरूले मन्त्रीका नाम प्रधानमन्त्रीलाई बुझाएमा आजै मन्त्रिपरिषद बिस्तार र नयाँ मन्त्रीहरूको शपथ तथा पदभारग्रहणसमेत हुनेछ।
नेपाली कांग्रेसले ८ मन्त्रालय पाउने भएको छ। नेकपा माओवादी केन्द्रले ५, जसपाले २ र एकीकृत समाजवादीले २ मन्त्रालय पाउने सहमति सत्ता गठबन्धनभित्र बनेको छ।
यस्तै जसपाले अहिले १ मन्त्रालय लिएकोमा अब एक राज्यमन्त्री पाउने भएको छ। लोसपाले १, नागरिक उन्मुक्ति पार्टीले १, नेपाल समाजवादी पार्टीले १ र आम जनता पार्टीले १ मन्त्रालय पाउने भएका छन्।
दलहरूले सरकारमा पठाउने मन्त्रीका नाम आज टुंगो लगाउने भएका छन्।
प्रधानमन्त्री दाहालले गत चैत ६ मा दोस्रो पटक विश्वासको मत लिएका थिए। उनले मन्त्रिपरिषद बिस्तार गर्न खोजे पनि भागबन्डा नमिलेका कारण ढिलाइ भइरहेको थियो।
गत पुस १० मा बनेको तत्कालीन ७ दलीय गठबन्धन सरकारमा रहेका नेकपा एमाले, रास्वपा र राप्रपा सरकारबाट बाहिरिएपछि प्रधानमन्त्रीले चैत ६ मा दोस्रो पटक विश्वासको मत लिनुपरेको थियो। त्यसअघि पुस २६ मा प्रधानमन्त्रीले विश्वासको मत लिएका थिए। प्रधानमन्त्रीले करिब एक महिनादेखि १६ मन्त्रालय हेर्दै आएका छन्।
