भारतले महाकाली नदीको पुल (सीता पुल) तरेर छाङरु जान अनुमति नदिएपछि नेपाली गणकहरु जोखिम मोल्दै दार्चुलाको छाङ्गरु र टिंकरमा जनगणना गर्न पैदल हिडेका छन्।
दार्चुलाको व्याँस गाउँपालिका वडा नम्बर १ मा पर्ने छाङ्गरु र टिंकर गाउँको जनगणना गर्न जिल्ला सदरमुकामबाट गणकद्वय सहायक जिल्ला जनगणना अधिकारी खगेन्द्र कार्की र गणक राजेन्द्र कार्की बिहीबार भारियासहित चार दिनको पैदल यात्रामा निस्किएको जिल्ला तथ्यांक कार्यालले जनाएको छ।
समुद्री सतहबाट ३२ सय मिटर र ३६ सय मिटरको उचाइमा पर्ने छाङ्गरु र टिंकर गाउँ जान भारतीय भूमि प्रयोगको अनुमति नपाए पछि गणकहरु चार जना भरियासहित चार दिन लगाएर छाङ्गरु र टिंकर पुग्ने गरी आफुहरु सदरमुकामबाट हिडेको सहायक जनगणना अधिकारी खगेन्द्र कार्कीले जानकारी दिए। गणकहरुलाई भारतीय भूमिको प्रयोग गर्न दिइएको भए उनीहरु १ दिनमै ती दुई गाउँमा पुग्नसक्ने स्थानीयले बताएका छन्।
भारतीय प्रशासनले दार्चुलाको छाङ्गरु र टिंकरमा जनगणना गर्न जाने समूहलाई आफ्नो भूमिको प्रयोगमा रोक लगाएको थियो। जिल्ला प्रशासन कार्यालय दार्चुलाले सहायक जिल्ला जनगणना अधिकारी खगेन्द्र कार्की र गणक राजेन्द्र कार्कीलाई भारतीय भूमि धार्चुलाबाट छियालेक–गब्र्याङ हुँदै महाकाली नदीको पुल (सीता पुल) तरेर छाङरु जाने गरी पासको व्यवस्था मिलाउन कात्तिक २५ गते भारतीय प्रशासनलाई पत्राचार गरेको थियो। तर, बुधवार सडक मार्ग अवरुद्ध भएको बहाना गर्दै भारतीय प्रशासनले आफ्नो भूमि प्रयोगमा रोक लगाएको थियो।
सहायक प्रमुख जिल्ला अधिकारी ज्योत्स्ना भट्ट जोशीले मंगलबार र बुधबार पुनः दुई पत्र पठाइएकी थिइन्। ‘भारतीय प्रशासनले सडक मार्ग अवरुद्ध भएको जवाफ पठाएको छ’, उनले भनिन्, ‘भारतीले सडक अवरुद्ध घएको भन्दै पत्र पठाएको छ।
