सिरहा नगरपालिकामा कोभिड १९ नियन्त्रणको नाममा अस्वाभाविक खर्च : सिरानीको खोलको मूल्य दुईहजार आठसय ७७ !

संबाददाता : ओम हमाल     प्रकाशित मिति: (२०७७ श्रावण २५, आईतवार) १९:०३

एउटा सिरानीको खोलको मूल्य कति पर्ला ? सामान्य खालको १०० रुपैयाँमै पाइने यस्ता कभर राम्रै खरिद गर्दा पनि ५०० भन्दा धेरै नपर्ला भन्ने धेरैले अनुमान गर्छन् । तर, सिराहा नगरपालिकाले एउटा सिरानीको खोललाई दुईहजार आठ सय ७७ रुपैयाँ तिरेर किनेको पाइएको छ ।

सिराहा नगरपालिकाले जिल्ला स्तरीय कोभिड–१९ नियन्त्रण समितिलाई बुझाएको खर्च विवरणमा सिरानीको खोलमात्र तीन लाख १९ हजार दुई सय ७५ रुपैयाँको किनेको देखिएको छ । यो मूल्यमा एक सय ११ वटा खोल खरीद भएको खर्च विवरण नगरपालिकाले सार्वजनिक गरेको छ । यसरी हेर्दा एउटा सिरानीको कोभरको मूल्य दुईहजार आठ सय ७७ रुपैयाँ पर्न जान्छ ।

सिरानी र त्यसको खोलमात्र होइन, अन्य सामानको मूल्य पनि अस्वाभाविक रुपमा बढी देखाइएको छ । बजारमा १० रुपैयाँमा पाइने मास्कलाई नगरपालिकाले २२ रुपैयाँ ८७ पैसामा खरिद गरेको देखाएको छ । ८७ हजार पांच सय ७५ थान मास्क खरिद गर्दा २० लाख दुई हजार नौ सय ९७ रुपैयाँ खर्च भएको नगरपालिकाले देखाएको छ ।

नगरपालिकाले पांच सय ५८ थान तन्ना अर्थात् बेडसिट खरिदमा ४५ लाख तीन हजार सात  सय ७५ रुपैयाँ खर्च भएको देखाएको छ । यसरी हेर्दा एउटा तन्नाको मूल्य आठ हजार ७१ रुपैयाँ तिरिएको छ ।

यो नगरपालिकाले कोभिड १९ नियन्त्रणको नाममा पांच करोड ९० लाख ८६ हजार चार सय ३० रुपैयाँ खर्च भएको जनाएको छ ।

यसैबीच, सिराहा नगरपालिकाका मेयर अशेश्वर प्रसाद यादवले खर्चको विवरण तयार गर्दा त्यसमा प्रिन्ट मिस्टेक भएको प्रतिक्रिया दिएका छन् । बढी खर्च देखाइएको सन्दर्भमा मेयर यादवले रुपैयाँ र पैसालाई नछुट्टयाएर सीधै लेखेका कारण रकम बढी देखिएको प्रतिक्रिया दिए । ‘हामी त्यो खर्च विवरणलाई चाँडै सच्याउँछौं’ मेयर यादवले भने, ‘हामीले बढी खर्च गरेकै छैनौं । यथार्थ खर्चलाई मात्रै विवरणमा समावेश गरेका छौं । तर, त्यो प्रिन्ट मिस्टेक भएकाले यसलाई सच्याएर अर्काे विवरण तयार पार्छौं ।’ साभार अनलाइनखबर


(२०७७ श्रावण २५, आईतवार) १९:०३ मा प्रकाशित

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना

Exchange Rate

Nepali Patro

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना