“सिधा कुरा जनतासंग” कार्यक्रमका प्रस्तोता रबि लामिछाने र युवराज कंडेल न्युज २४ टेलिभिजनबाट पक्राउ

संबाददाता : ओम हमाल     प्रकाशित मिति: (२०७६ श्रावण ३०, बिहीबार) २०:१०

प्रहरीले न्युज २४ टेलिभिजनका पत्रकार रवि लामिछाने र युवराज कँडेललाई काठमाण्डौको महाराजगंजस्थित न्युज २४ को कार्यालयबाट पक्राउ गरेको छ ।

जिल्ला प्रहरी कार्यालय चितवन र काठमाडौं प्रहरी परिसरको टोलीले बिहीबार साँझ उनीहरुलाई पक्राउ गरेको प्रहरी उच्च स्रोतले जानकारी दिएको छ । केही दिनअघि चितवनमा आत्महत्या गरेका पत्रकार शालिकराम पुडासैनीको मृत्युको विषयमा अनुसन्धान गर्न प्रहरीले लामिछाने र कँडेललाई पक्राउ गरेको हो ।

त्यस टेलिभिजनबाट प्रसारण हुने “सिधा कुरा जनतासंग ” कार्यक्रमका प्रस्तोता रहेका उनीहरुलाई आत्महत्यामा दुरुत्साहन गरेको अभियोगमा अनुसन्धानका लागि नियन्त्रणमा लिएको प्रहरीले जनाएको छ ।

पहिले न्युज २४ टेलिभिजनमा नै काम गरेका पत्रकार पुडासैनीले आत्महत्या गर्नुअघि रेकर्ड गरेको भनिएको भिडियोमा उनले लामिछाने र कंडेलको कारण आत्महत्या गर्नुपरेको बताएका थिए ।

यसभन्दा अघि पत्रकार पुडासैनीले आत्महत्या गर्नुअघि रेकर्ड गरेको भनिएको भिडियोमा उल्लेख गरिएकी युवती ओखलढुंगाकी युवती रुकु भन्ने अस्मिता कार्कीलाई काठमाण्डौंबाट नै पक्राउ गरेको थियो ।

यसैबीच प्राप्त जानकारी अनुसार, आजै प्रसारण हुने कार्यक्रम सीधाकुरा जनतासँग प्रसारण हुनु एक घण्टा २५ मिनेट अघि प्रस्तोता लामिछानेलाई प्रहरीले नियन्त्रणमा लिएको हुँदा पौने नौ बजेको सो कार्यक्रम अवरुद्ध भएको छ ।


(२०७६ श्रावण ३०, बिहीबार) २०:१० मा प्रकाशित

Exchange Rate

Nepali Patro