पारवहन सन्धि बिपरित नेपाली मालबाहक सवारीलाई जोगबनी बजारको रुट प्रयोगमा रोक

संबाददाता : ओम हमाल     प्रकाशित मिति: (२०७६ असार १६, सोमबार) २२:१४

नेपाल–भारतबीच भएको द्विपक्षीय पारवहन तथा मैत्री सन्धि बिपरित भारतीय पक्षले बिना सूचना नेपाली  मालवाहक सवारीलाई जोगबनी बजारको रुट प्रयोगमा रोक लगाएको छ । फारबीसगञ्जको नगरस्तरीय प्रशासन कार्यालयले चार दिनदेखि नेपालले प्रयोग गर्दै आएको जोगबनी बजारको रुटबाट मालबाहक सवारी जान रोक लगाएको हो । भारतीय अवरोधका कारण नेपाली मालवहाक सवारी साधन जोगबनी रेल्वे स्टेशनसम्म औद्योगिक कच्चा पदार्थ लिन  जान पाएका छैनन् ।

दुई देशको पारवहन सन्धीमा कोलकत्ताबाट विराटनगर नाकाका लागि जोगबनी बजारको रुट प्रयोग गर्ने र नेपालले प्रयोग गर्ने पारवहन सुविधाको रुटमा केन्द्र सरकार र स्थानीय सरकारले अबरुद्ध गर्न नपाउने उल्लेख छ । तर, कार्यालय अनुमण्डल पदाधिकारी, फारबिसगञ्जका नाममा २२ मेमा सार्वजनिक गरिएको परिपत्रमा नेपालबाट भारततर्फ जाने खाली गाडी आईसीपी भएर मात्र फर्कनु पर्ने, जोगबनी बजार हुँदै गए कारबाही गर्ने उल्लेख छ ।

यसले सयौं गाडी र खाली कन्टेनर बोकेका ट्रेलरहरू नेपालतर्फ अलपत्र परेका छन् ।

भारतको स्थानीय प्रशासनले जोगबनीको रेल्वे यार्डमा नेपालका लागि आएका सामान ओसार्न खाली ट्रक पनि जान दिएको छैन । यसका कारण चार दिनदेखि नेपालका लागि आएका फलामे कच्चा पदार्थ यार्डमा अलपत्र परेका छन् । मुख्यतः गोल्छा अर्गनाइजेशन, आरती स्ट्रिप लगायतका ठुला उद्योगहरुको कच्चा पदार्थ जोगबनी रेल्वे यार्डमा रोकिएका छन् ।

रेल्वे यार्डमा आएको औद्योगिक कच्चा पदार्थ अनलोड भएको १२ घण्टाभित्र क्लियर गरिसक्नुपर्ने प्रावधान छ । तोकिएको समयमा क्लियर नभएको खण्डमा प्रतिघण्टा एक वागेनको १ सय ५० भारु तिर्नुपर्छ । चार दिन यतामात्र धेरै औद्योगिक कच्चा पदार्थ रेल्वे यार्डमा रोकिएकाले नेपाली उद्योगी व्यावसायीहरुले थप व्यायभार बेहोर्नु परेको छ ।

भारतीय प्रशासनले निर्माणधीन आईसीपीको बाटो भएर खाली ट्रक र लहरी लैजान भनेको छ । तर जोगबनी रुटमा दैनिक ३ सय ट्रक र लहरी आउने जाने गरेकोमा आईसीपीबाट दैनिक बढीमा ६० बटा मात्र आउन सक्छ ।

मोरङका प्रमुख जिल्ला अधिकारी रमेश केशीले भने जोगबनी रुट बन्द गरिएको आधिकारिक जानकारी नभएको बताए । विराटनगर भन्सार कार्यालयका प्रमुख भन्सार अधिकृत मिंमास अधिकारीले भने शुक्रबारदेखि नेपालले प्रयोग गदै आएको जोगबनीको रुटमा खाली सावारी साधान लैजान भारतीय प्रशासनले रोक लगाएको बताए । यो विषय मौखिक रुपमा मोरङ प्रशासनलाई दिइएको उनले बताए ।


(२०७६ असार १६, सोमबार) २२:१४ मा प्रकाशित

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना

Exchange Rate

Nepali Patro

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना