बिना फाइल धमाधम मोटरसाइकल नामसारी

संबाददाता : मोनिका गुरुङ     प्रकाशित मिति: (२०७३ आश्विन १५, शनिबार) १९:३२

काठमाडौ चन्द्रागिरी नगरपालिका– ८ सतुंगलस्थित यातायात व्यवस्था कार्यालयले मोटरसाइकल विना फाइल धमाधम नामसारीको काम हुन थालेको छ । ताल्छीखेलस्थित कार्यालयबाट सतुंगल ल्याइएका फाइलहरु बोरामा नै थन्काइएका छन् । ती फाइललाई व्यवस्थापन नगर्दै यातायात कार्यालयले मोटरसाइकलको धमाधम नामसारी गर्न थालेको हो ।

यातायात व्यवस्था कार्यालयका निमित्त प्रमुख वेदप्रसाद आचार्यले सेवाग्राहीको काम नरोक्न ढड्डाका आधारमा नामसारी गरिएको बताए । ‘वर्षाका कारणले कार्यालय व्यवस्थापनमा ढिलाइ भइरहेको छ,’ उनले दाबी गरे, ‘यो महिना भित्रमा सम्पुर्ण काम सम्पन्न हुनेछ ।’

उनले कार्यालय सुचारु गरेर स्थानान्तरण गर्नु पर्दा पनि समस्या आएको बताए । चन्द्रागिरिस्थित कार्यालय परिसरमा भेटिएका गोदावरीका रोशन खडकाले कार्यालयका कर्मचारीहरुको ढिलासुस्तीका कारणले सेवागा्रहीले अनावश्यक झन्झट भोग्नु परेको बताए । ‘कार्यालय आइपुगेका फाइल क्रमश व्यवस्थापन भएपछि मात्र नामसारी गर्नुपथ्र्यो,’ उनले भने, ‘यसो नगर्दा नामसारी भइसक्दापनि सेवागा्रही पुन: कार्यालयमा धाउन बाध्य भएका छन् ।’

कार्यालयले यातायात विभागबाट कार्यालय स्थानान्तरणको स्वीकृति पाएको तीन साता बितिसक्यो । तैपनि सम्पूर्ण फाइल स्थानान्तरण गरिसकिएको छैन । फाइल लगायत सामान ओसार प्रसारका लागि ५ लाख रुपैयामा ठेक्का पाएका ठेकेदार कम्पनीको म्याद सकिएर थप गरिसकेको छ । तर पनि सञ्चालकले पनि ढिलाई गरिरहेको कर्मचारीको आरोप छ ।

यातायात मन्त्रालयले सेवाग्राहीको चाप, फाइल वृद्धिका कारणले ताल्छीखेलमा सञ्चालित कार्यालयको कोठा, परिसर ज्यादै साधुरो भएको, प्राविधिक फाँट अरुको जग्गामा रहेको टहरामा सञ्चालन गर्नुपरेको र पार्किङको समस्या भएको भन्दै कार्यालय स्थानान्तरणका लागि भदौ २४ मा स्वीकृति दिएको थियो ।

संतुगलस्थित कार्यालयमा ल्याइएका बोरामा कोच्चिएका फाइलहरु शौचालय र कार्यकक्षमा थन्काइएका छन् । मोटरसाइकलको प्राविधिक जाँचका कुनै व्यवस्था मिलाइएको छैन । केहि दिन सडकमै प्राविधिक जाँच गरिएको थियो । स्थानीयबासीले एम्बुलेन्स छिर्न समेत बाटो अवरोध भएको भन्दै बन्द गर्न लगाएका थिए ।

जसले सेवाग्राहीहरु नामसारी गर्न ताल्छीखेलस्थित कार्यालयमा प्राविधिक चेकजाँच गराई चन्द्रागिरीमा पुग्न बाध्य छन् । संतुगलस्थित कार्यालय नजिकै धानखेतमा पार्किङको व्यवस्था गरिएको छ । हिलोका कारणले सेवागा्रही सडकमा पार्किङ गर्न बाध्य छन् ।

पैसा तिर्न भने दुवै स्थान रहेको कार्यालयमा व्यवस्था मिलाइएको छ । चन्द्रागिरीमा ५६ लटसम्मका फाइल स्थानान्तरण भइसकेका छन् । त्यो भन्दा माथिको लटको फाइल ताल्छिखेलस्थित कार्यालयमै बोरामा थन्काइएका छन् । फाइल राख्ने फलामका दराज कार्यालय परिसरमा त्यसै परेका छन् ।


(२०७३ आश्विन १५, शनिबार) १९:३२ मा प्रकाशित

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना

Exchange Rate

Nepali Patro

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना