१३ वर्षिया छात्राको रहस्यमय हत्या : बलात्कार प्रयासपछि हत्या भएको हुन सक्ने आशंका

संबाददाता : ओम हमाल     प्रकाशित मिति: (२०७५ भाद्र १०, आईतवार) ०८:३१

पोखरा महानगरपालिका-१९ लामाचौरकी १३ वर्षीया बालिका पुष्पा केसीको मृत्यु रहस्यमय बनेको छ।  विन्ध्यवासिनी मावि बाटुलेचौरमा कक्षा ६ मा अध्ययनरत छात्रा केसी बिहीबार ५ः३० बजे विद्यालयबाट अध्ययन सकेर बहिनीसँगै घर फर्कने क्रममा घरभन्दा एक सय मिटर वरै स्कुल बसबाट एक्लै ओर्लिएकी थिइन l तर उनी शुक्रबार साँझ गाउँ नजिकै मृत फेला परिन्।

छोरी अघिल्लो दिनको साँझदेखि नै हराएपछि परिवार र आफन्तले हारगुहार गरेपछि खोजीका क्रममा घरदेखि करिब दुई किलोमिटर पर फापरतरोमा बालिका मृत अवस्थामा फेला परेकी हुन्। बालिकाको पुस्तकसहितको झोला घटनास्थलभन्दा २ सय मिटर वर प्लटिङमा फेला परेको थियो।

शवको प्रकृति हेर्दा बालिकाको बलात्कार प्रयासपछि हत्या भएको हुन सक्ने स्थानीयले शंका गरेका छन्। बालिकाको शव एकान्त र झाँडीभएको भिरमुनिको भिरालो जमिनमा फेला परेको हो। जामा र जुत्ता शव भन्दा केही पर फेला परेको थियो।

पोस्टमार्टमको प्रारम्भिक रिपोटमा बालिकाको टाउँकोमा रगत जमेको देखिएको छ। यसैगरी छाती र देब्रे फोक्सोमा चोट देखिनुको साथै देब्रे खुट्टाको कुर्कुच्चा भाँचिएको पाइएको पोस्टमार्टममा सहभागी डाक्टरले बताएका छन्।

बालिकाका काका धु्रव केसीले छोरीको रहस्यमय रुपमा हत्या भएको भन्दै निष्पक्ष छानबिन गरी दोषीमाथि कडा कारबाहीको माग गरेका छन्। विद्यालय बसले बालिकालाई घरमै नझारेर बीचबाटोमा ओराल्नु कमजोरी भएको उनले बताए।
बहिनीलाई स्कुल बसले घर अगाडि नै झार्नु र केटाकेटीले भनेकै आधारमा दिदी पुष्पालाई घरभन्दा वरै झार्नु विद्यालय प्रशासनको कमजोरी भएको उनले सुनाए। बालबालिका घरसम्म पुर्‍याउनु विद्यालय प्रशासनको काम हो। बीचबाटोमै ओरल्दा गलत नियत राख्नेको फन्दामा छोरी परेको उनले बताए।

यसैबीच बालिका अध्ययरत विद्यालय विन्ध्यवासिनी माविले शनिबार विज्ञप्ति जारी गरी घटनाको यथाशीघ्र छानबिन गरी दोषीलाई कडा कारबाहीको माग गरेको छ। विद्यालयका प्रधानाध्यापक कृष्णप्रसाद आचार्य र विद्यालय व्यवस्थापन समितिकी अध्यक्ष चन्द्रा थापाद्वारा जारी विज्ञप्तिमा सत्य, तथ्य यथाशीघ्र छानबिन गरी दोषी उपर कडा कारबाहीको माग गरिएको छ।

जिल्ला प्रहरी कार्यालय कास्कीका प्रमुख एसपी ओम रानाले घटनाको अनुसन्धान भइरहेको बताएका छन्।


(२०७५ भाद्र १०, आईतवार) ०८:३१ मा प्रकाशित

Exchange Rate

Nepali Patro