ऋण लगानी गर्न नसकेका बैंकले प्रतिस्पर्धि बैंकमा पैसा राख्दै ब्याज खाँदै साढे तीन अर्ब कमाए

संबाददाता : ओम हमाल     प्रकाशित मिति: (२०७४ भाद्र १६, शुक्रबार) ०५:२४

सामान्यतया बैंक तथा वित्तीय संस्थाले सर्वसाधारणबाट संकलन गरेको निक्षेपलाई कर्जा लगानीमा प्रयोग गर्छन् । तर, कर्जा लगानी गर्न नसकेका बैंक तथा वित्तीय संस्थाले अर्कै तरिकाबाट पनि अरबौं कमाइ गरिरहेका छन् ।

 

संकलित निक्षेपलाई अर्कै बैंक तथा वित्तीय संस्थामा ब्याजमा लगाएर उनीहरुले सो कमाई गरेका हुन् । गत आर्थिक वर्ष २०७३/७४मा यस माध्यमबाट बैंक तथा वित्तीय संस्थाले ३ अर्ब ४७ करोड रुपैयाँसम्म व्याज कमाएको राष्ट्र बैंकको तथ्यांकले देखाउँछ । अघिल्लो आर्थिक वर्ष २०७२/७३ मा झन् धेरै ३ अर्ब ९१ करोड रुपैयाँ उनीहरुले कमाएका थिए ।

बैंक तथा वित्तीय संस्थाले आफुले उठाएको निक्षेपको लगभग ८३ प्रतिशतसम्म रकम कर्जा लगानी गर्न पाउँछन् । तर, यो सीमामा कर्जा लगानी गर्न नसक्ने बैंकहरुले अर्को कुनै बैंकमा निक्षेपको रुपमा पैसा राखेर व्याज खाने प्रवृत्ती छ ।

गत आवमा बैंक तथा वित्तीय संस्थाहरुमा कर्जा योग्य पुँजी अभाव भएर ग्राहकहरुले कर्जा नपाएको गुनासो गरेका थिए । तर, बैंकहरुले भने अर्को वित्तीय संस्थामा ७५ अर्ब २९ करोड रुपैयाँ निक्षेप राखेका थिए ।

हुनतः निक्षेप राखिएको बैंकबाट पनि सर्वसाधारणले कर्जा पाउन सक्छन् । तर, एक बैंकसँग ग्राहकले बनाएको सम्बन्ध अर्को बैंकमा समान नहुन सक्छ । यसबाहेक वित्तीय पहुँचको आधारमा हेर्ने हो भने सबै बैंक तथा वित्तीय संस्थामा सबै ग्राहकको पहुँच पनि नपुग्ने अवस्था हुनसक्छ ।
हुनत एउटा बैंकले यसरी अर्को बैंकमा निक्षेप राख्न नपाउने होइन । यसबाहेक बैंकहरुले एक अर्कालाई सापटी दिन सकिने व्यवस्था समेत छ । कर्जा लगानी योग्य पुँजीको खाँचो हुँदा एक अर्कासँग सापट लिनुलाई खासै नराम्रो मानिदैन । तर, आफु भने कर्जा लगानी बढाउन प्रयत्न नगर्ने र अर्काेमा निक्षेप राख्ने बैंकहरुलाई कम व्यवसायिक मानिन्छ ।

व्याज खाएर ढुक्कले बस्ने यस्ता बैंकहरुलाई हतोत्साही गर्न राष्ट्र बैंकले अर्को बैंकले ग्रहण गर्ने यस्तो निक्षेपको रकम कर्जा लगानीमा प्रयाग गर्न नपाउने व्यवस्था गरेको थियो । तर, त्यसको एक सातामै राष्ट्र बैंकले आफ्नो अडान फेर्यो र कर्जा लगानी गर्न सक्ने पुरानै व्यवस्थालाई निरन्तरता दियो ।

वित्त कम्पनी र विकास बैंकमा यस्तो प्रवृत्ती बढि 

बैंकहरुले कल डिपोजिटको रुपमा एक अर्कोमा यसरी निक्षेप राख्ने चलन छ । कल डिपोजिटमा अघिल्लो वर्ष बैंकहरुले ११ प्रतिशतसम्म व्याज दिएका थिए । यद्यपि, राष्ट्र बैंकले भने औसत ४.४ प्रतिशत व्याज दिइएको जनाएको छ ।

कल डिपोजिटमा पैसा राखेर  व्याज खानेमा बिकास बैंकहरुकाे संख्या बढि छ। विकास बैंकहरुले मात्रै अर्कोमा निक्षेप राखेर २ अर्ब ५ करोड रुपैयाँ व्याज कमाएका छन् । त्यस्तै, वित्त कम्पनीले ६३ करोड ८० लाख र वाणिज्य बैंकले ७८ करोड १० लाख व्याज कमाएका छन् ।

भिवोर सोसाइटी र लुम्बिनी फाइनान्स मर्ज भएर बनेको लुम्बिनी बिकास बैंकले अर्कोमा यसरी निक्षेप राखेर २१ करोडसम्म व्याज कमाएको छ । त्यस्तै गत आवमा ५० करोड कमाएको कैलाश बिकास बैंकले अर्कोमा निक्षेप राखेरै १७ करोड व्याज आम्दानी गरेको छ ।

४३ करोड रुपैया नाफा कमाएको ओम डेभलपमेन्ट बैंकले पनि अर्काकोमा निक्षेप राखेरै १५ करोडसम्म व्याज कमाएको छ । कर्जायोग्य पूँजी अभाव रहेको भनिएको मेगा बैंकले अर्को बैंकमा पैसा राखेर १२ करोड व्याज खाएको थियो । वाणिज्य बैंकमा १० करोडभन्दा माथि व्याज खाने मेगा बैंक मात्रै हो । अनलाइन खबर डट कमबाट साभार 


(२०७४ भाद्र १६, शुक्रबार) ०५:२४ मा प्रकाशित

°
Weather from OpenWeatherMap

मुख्य समाचार

सबै

नेकपा मजदुर संघको केन्द्रीय अध्यक्ष लोकेन्द्र थापा ‘आकाश’ कारबाहीमा

काठमाडौँ : नेपाल कम्युनिस्ट पार्टी निकट अखिल नेपाल क्रान्तिकारी ट्रेड यूनियन महासंघका केन्द्रीय सदस्य एवं अखिल नेपाल क्रान्तिकारी हाइड्रो तथा खानी मजदुर संघको केन्द्रीय अध्यक्ष लोकेन्द्र थापा ‘आकाश’.....

नेपाल–भारतबीच समाधान गरिनुपर्ने बिबादित मुद्दाहरु : हरि रोक्का

सात दशक छोटो समय होइन, जुन सुकै कोणबाट हेरे पनि । स्वतन्त्र भारतसँगको नेपाली सहयात्रा सात दशक पुरानो भइसकेछ । १०४ वर्षे जहानियाँ राणा शासनको अँध्यारो युगबाट उज्यालोमा प्रवेश गर्दै गर्दा.....

काठमाण्डौ प्रहरीद्वारा टेलीभिजनकर्मी रबि पत्नीको चितवन प्रहरी प्रमुखसहित तीन जनाविरुद्धको मुद्दा दर्ता गर्न अस्वीकार

पत्रकार शालिकराम पुडासैनी आत्महत्या प्रकरणमा प्रहरी हिरासतमा रहेका टेलिभिजनकर्मी रवि लामिछानेकी पत्नी निकिता पौडेलको जाहेरी दर्ता गर्न प्रहरीले अस्वीकार गरेको छ । प्रहरी अनुसन्धानमा.....

Exchange Rate

Nepali Patro